Heestani waxa ay ku saabsan tahay saddex fannaan oo qiimo weyn lahaa, fanka Soomaalidana kaalin mug iyo miisaan leh oo muuqata ku dhex lahaa. Waa, Faysal Cumar Mushteeg (AHUN), Cabdalle Maxamed Sagsaag (AHUN) iyo Maxamed Mooge Liibaan (AHUN).
Waa beri beryaha kamid ah oo ay u baxeen Faysal iyo Cabdalle Carabaha, gaar ahaan, dalka Imaaraatka oo ay u xoogsi tageen. Muddo badan oo ay halkaas ku maqnaayeen ayuu dhararsanayaa Jaalkoodii Maxamed Mooge oo isagu dalka sii joogay. Kaddib ayaa uu hammiyayaa inuu saaxiibbadii farriin u diro, taas oo uu ku muujinayo maqnaanshahoodii uu dhararsaday, dhanka kalena waano iyo dardaaran lexo-jeclo iyo walaalnimo wata baa uu farayaa. Sida heestaba aynu ka arki karno wuxu ku adkaynayaa inaanay dhulkii hooyo illaabin, inaanay dhalashadoodii ka tagin, inay wax madhxistaan oo kayd samaystaan — maadaama oo ay Qurbe joogaan — inaanay dhaqankoodii iska-beddelin iyo inaanay ugu danbayn dedaalka iyo tacabka dayn ee dhexda ay u xidhaan sidii ay wax u taransan lahaayeen.
Ereyada Maxamed Mooge ayaa iska leh, waxaana ay u dhigan yihiin sidan ee dhugasho wanaagsan:
“Walaalkay dhabiyo dhiigaygiyoow
Dhoofkiinnu wuu igu dhararanyee
Wax idin dhiba Ilaah haydin dhaafiyee,
“Dhulkii hooyo waakii
Dhaqashaduna waa meel
Dhulkii hooyo waakii
Dhalashadiina waa meel
Waan idin dhaariyee
Ha is dhalingeddiyina.”
War aan dhaabay iyo ducaan kuu dhigee
Adna dhaayihiyo dhegaha u furoo
Yay ku dhaafin waanadu way iga dhantee:
“Dhaqashada ha luminina
Dhigta oo ha waayina
Waan idin dhaariyee
ha is dhalingeddiyina.”
Ninkii dhiig leh baa illayn dhiidhiyee
Ha is dhiganinoo shay ku dhiirradoo
Yaan lagu dhalliiline dhugta waanadoo
Dhawra xoolihiinna xooggana ku dhaata
Waan idin dhaariyee hays dhalingeddiyina.”
Markii ay Faysal iyo Cabdalle heestii iyo farriinteediiba ay gaadhay, wuxu Faysal sheegay inuu Cabdalle ku yidhi: “Waar Cabdalle maxaa aynu yeelnaa, waad aragtaa oo Maxamed oo inaga yar, jaalkeenna ah baa ina soo waaniyey e’, ma u jawaabnaa?” Kaddib baa uu Cabdalle odhanayaa, “Waar maya ee waa ceeb nin ina soo waaniyey in aynu u jawaabnaaye, aynu nidhaahno uun Alle ha inagu anfaco.”
Faysal oo maad miidhan ahaa baa beri danbe odhanaya, “Markii aan halkaas joogay, haddii aan u jawaabi lahayn Maxamed Mooge waxaan ku odhan lahayn: ‘Qurbe inuu dhib badan yahay.. Adigu dhaadi mayside.. Raggu waa dhididayaa.. Lacagtuu dhiganayaa.. Adna Maxamed soo dhoof.” Kkkkkkkkkk
Dhammaantood Ilaahay godka haw nuuro oo jannooyinkiisa ha durduuriyo.
Qore. Cabdicasiis-Daacad Ibraahin Ciise
Isha ku hay Shabakada caalamiga ah ee WWW.Hayaannews.net oo kala soco wararkii ugu danbeeyey adduunyada.
#Hayaannews, Office
#Mustafe_Janaale
EMAIL: Hayaannewsonline@gmail.com
