Waa Kuma Abwaan Siddiiq Maxamed Burmad ?
Maansadan waxa tiriyay Siddiiq Maxamed Burmad oo ku dhashay magaalada Hargeysa sannadku markuu ahaa 1983kii. Magaca hooyadii waa Hodan Maxamed Dhoobaale. Waxbarashadiisa dugsiyada hoose, dhexe iyo sareba waxa uu ku qaatay isla magaalada Hargeysa.
Markii u horraysay ee uu dareemo inuu tix samayn karo waxa uu ahaa fasalka toddobaad ee dugsiga dhexe. Siddiiq Burmad waxa uu afar goor ka qayb galay tartan suugaaneedyo lagu qabtay magaalada Hargeysa, waxaana u suurta gashay inuu afartaas tartan suugaaneedba ku soo baxo. Mar waxa uu ku guulaystay kaalinta koowaad, marna kaalinta labaad, laba goorna kaalinta saddexaad. Hal-abuurkiisa maanso iyo heesihiisa oo in badan caan ah waxa ku luuqeeya fannaaniinta Xiddigaha Geeska.
Abwaan Siddiiq waa suxufi shan iyo toban sanno ka shaqaynayay Raadyowga Hargeysa. Wuxuu noqday macallin saxaafadeed oo ka hawlgala haayad ka shaqaysa arrimaha warbaahinta oo ka oo jeedda waddanka Holan lana yidhaahdo Free Press Unlimited. Waxaanu halkaas ku tababari jiray warfidiyeenno ka soo kala jeeda Somaliland, Soomaaliya iyo Kiiniya. Eegga waa weriyaha laanta afka Soomaaliga ee BBCda wararka uga tebiya Somaliland.
Tixdan waxa uu gabayaagu ugu baroor-diiqay Marxuumad Nimco Aadan Hurre (Nimco-Gabaydo). Kaalinteedii bulsho, teedii suugaaneed iyo doorkeedii dadnimo ayuu ku xusayaa.
Waxa uu yidhi:
Wedkii helay hebelladii
Horee taariikhda galay
Haldoor laga wada nixiyo
Wedkii hoygooda dhigay
Intaas oo wada halyay
Miyuu hal-abuuraddii
Caawana hoygeeda dhigay?
Huqbaan ruux baajinayn
Heddiisu dhammaatayoo
Hortaaba Nimcoy la qaad
Hurriyo Abababa la-waa
Dhammaan hoosbay jiraan!
Adigu hoyatee Nimcoy
Su’aalaa kaa hadhee
Halkaagii yaa kefayn?
Hawshaadii yaa debbari?
Bulshada yaa hiil noqon?
Haweenkii yaa meteli?
Tumaa hadimada ka jiri?
Barbaartii yaa horkici
Halbeeg tolowyay ka dhigan
La hiigsado yaa u noqon?
Hawraartiyo maansadii
Hanuunka xambaarsanayd
Dadkaagii yaa ku hagi?
Hagaaggii yaa na fari?
Hiddaha yaa tolow na bari?
Adduunyada hawlyaraan
Hubaal kagamaad tegine
Dalkana weli maad hagrane
Awood kalamaad hadhine
Horaad u shaqaysatee
Idanka Alle waad hirqani
Haraha jannaddee macaan
Albaabbada Haawiyaad
Hareer mari waanad heli
Hoobaanta Fardowsa oo
Hadimo kaa dheer Nimcoy
Isha ku hay Shabakada caalamiga ah ee WWW.Hayaannews.net oo kala soco wararkii ugu danbeeyey adduunyada.
#Hayaannews, Office
Hargeysa, Somaliland
#Mustafe_Janaale(#MJ)
EMAIL: Hayaannewsonline@gmail.com
