Maansadan waxa ay Nimco Aadan Hurre ugu baroor-diiqday Alle ha u naxariistee Marxuun Maxamed-Rashiid Muxumed Faarax oo ahaa Xoghayaha Guud ee Ururka Saxaafadda Soomaalilaan ee SOLJA oo 26kii Disember 2014ka ku geeriyooday magaalada Nayroobi. Waxa 30kii Disember 2014ka lagu aasay xabaalaha Xeedho ee Hargeysa.
Marxuun Maxamed-Rashiid waxaa uu ahaa astaanta lagu garto xorriyadda Saxaafadda ka hana-qaadday Soomaalilaan, iyada oo uu goor walba iyo goob kasta la taagnaa badheedhe uu ku difaacayo xaquuqda rayi-dhiibashada iyo in dadku fekerkooda si xor ah u tebiyaan.
Eebbe ha u naxariistee marxuunkan oo kartida Eebbaha Sarreeya ee hufani u dhaliyay awgeed, waxa uu u muuqday deyrka col iyo cadaaweba kaga gudban inta u dhaq-dhaqaaqda xuquuqda aadamaha.
Maansadani waxa ay ka mid tahay tixihii ugu dambeeyay ee ay curisay Abwaan Nimco-gabaydo, labadooda Eebbe godka ha u nuuro. Waxa ay ka warramaysaa kartidii marxuunka iyo hibooyinkii Alle siiyay.
Waxa ay tidhi.
Ifku geeddi weeyaan
Gabbal-dhiciyo waaberi
Laga guurayaayoo
Addoomaha ku guud nool
Qofba galab ka hoydee
Allaylehe nin goba iyo
Halyay garasho dheer iyo
Muumin ruuxa goolmoon
U gargaari jirayoo
Ka weynaa gankiisiyo
Maanta geesibaa baxay
Garabkayga taagnaa
Gacmo-madhan Allahayow
Adaan kuu goglanayaa
Naxariis gu’ weyn iyo
Raxmaddaada aan gudhin
Godolkeeda siiyoo
Qabrigiyo ku guulee
Godka aakhiruu tegay.
Nin garaad wacnaayoo
Gudi jiray abaalkoo
Geli jiray markiisiyo
Hanad lagu goblamay iyo
Maanta geesi baa baxay
Garabkayga taagnaa
Gacmo madhan Allahayow
Adaan kuu goglanayaa
Naxariis gu’ weyn iyo
Raxmaddaada aan gudhin
Godolkeeda siiyoo
Qabrigiyo ku guulee
Godka aakhiruu tegay
Isha ku hay Shabakada caalamiga ah ee WWW.Hayaannews.net oo kala soco wararkii ugu danbeeyey adduunyada.
#Mustafe_Janaale(#MJ)
#Hayaannews, Office
Hargeysa, Somaliland
EMAIL: Hayaannewsonline@gmail.com