Akhristeyaal qormadeena Dhaqanka iyo Suugaanta, waxa aynu todobaadkan ku soo qaadanaynaa Maanso uu tiriyey Abwaan Cabdiraxmaan Tahar, taasoo magaceeda la yidhaahdo GEED.
Maansadan waxa uu curiyuhu ku cabirayaa manfaca iyo faa’idada ay dhirtu u leedahay deegaanka, dadka iyo duunyada, isagoo si qoto dheer oo qiimo badan u sharaxaya ahmiyadda dhirta iyo dheefteeda.
Waxa kale oo uu kaga dardaar warinayaa natiijada xun ee laga dhaxlay gumaadka iyo goynta aan loo meel dayin ee lagu hayo Geedaha “garaad la’aanta lagu gumaaday dhirtii midhaha laga guran jiray miyi iyo magalaba” ayuu yidhi Cabdi Tahar oo tilmaamaya inay aqoon-darro iyo doqonnimo tahay xaalufinta dhirtu.
Dhawaaqa hal-abuurka Suugaantu waa mid kamida farriimaha ugu culus ee bulshada lagu wacyi-geliyo ee dhegaha dadweynaha sida sahlan u sameeya.
Haddaba Maansada Geed waxa ay ku bilaabmaysaa sidan:
Geed midho macaanoo
Gadhka lawga saaroo
Gubbanaayey baa yidhi
Ga’yigaan ku noolahay
Ga’daal socodka lagu badi.
Kala gurre la daba socoy
Isku geeye lama rabbo,
Xaqa lama gaboodsado
Gardaradda la taageer,
Runta goofka lagu tuur
Beenta laysku gacan sii,
Gu’te waajib laga bood
Gurte yeelay sacab badan,
Gobonnimadu faan maleh
Gunimada la badhi-taar.
Fulle geesi dhaafiyo
Guul-aasku fara baday.
Gudhan looga talo doon
Garab daarku nagu diiq,
Ga’yigaan ku noolahay
Gabanadii la dhali jiray
Kuwa lagu gardaadsado
Geel toosiyaw badan,
Ga’yigaan ku noolahay
Nin gufaystay labadiyo
Waxaa gaadhka ugu jira
Nimaan khuuro kala goyn,
Ga’yigaan ku noolahay
Guurti sama ka talisiyo
Gadhwadeenka lama rabo,
Guddi xaajo loo diray
Gacal iyo xigtiyo ehel
Hadii laysku gawraco
Gurmadkooda waxa gala
Kala geeyahooddii
Gacan-qaadku nabad iyo
Noqon waa af garashee
Waa guluf colaad rida
Ga’yigaan ku noolahay
Dadku gawsahoodiyo
Gasiin uurka lagu rido
Hadii naarta lagu galo
inyaroo ka giigtoo
xalaal goosta mooyee
Waxa badan gambor cune,
Dadna wuxuu u kala go’ay
Garaad lagu danaystiyo
Nin gunaystay maankii
Rabbi ugu gargaariyo
Aqoonyahan gabanayoon
Nimaan giirka sare iyo
Gaadadda la soo kicin.
Ga,yigaan ku noolahay
Xaqa ruuxa gaasira
Hadii laga gilgilan jiray
Nin giriifay eedoow,
Ga’yigaan ku noolahay
Sacab lagu gargaariyo
Garrab waxaa la siiyaa,
Nin lu,gooyey toban goor
Ga’yigaan ku noolahay
Geedi horumar keeniyo
Wali guusha lama rabo.
Waxse laysku guusoo
Garabsiga mid lagu yahay
In gunnaadku sii korro.
Gocoshana la dayn waa
Balse guuxa laabtiyo
Gaagaabsi mooyee
Gunta eesha hoosiyo
Ma gorfeeyo waxa jira
Xalna gaadhi waayoo
Gondohooda waxa yaal
Gafaan joogsanaynoo,
Ga’yigaan ku noolahay
Galoolkiyo maraakiyo
Dammalkaan la goyn jirin
Gudin iyo dab lagu madhi
Golcastiyo cadceedana
Hadhka geedka laga helo
Sida looga hoos galo
Ama loo gaboodsado
Lagu doorsay giriyaad,
Caqligoodu garanwaa
Waxaad gabagabayseen
Adhigga iyo geeliyo
Lo’da giirka waynlihi
Gasiinkay ku foofaan.
Caqligoodu garan waa
Dhirtu waa hu iyo guri
Iyo gogosha lagu laddo
Marna midho lagoostoo
Lagu reebo gaajada
Iyadaad ka gurataan.
Garaadkoodu wuxu faray
Dawadiyo gargaarkiyo
Galladiyo dabiibkay
Kayntu gaar u leedahay
Gunta inuu ka wada jaro.
Ga’yigaan ku noolahay
Ilayn duul gambiyanoo
Caqligoodu gudhaybuu
Guulle iga dhex beeree
Garanwaaga lama jaro
Anoo gudaha toonkiyo
Gurigooda uga baxay
Ama midho la goosta leh
Laamihii gun iyo baar
Goonyaha u bixi jiray
Baxda guudka sare iyo
Garbahayga haystaa
Garba duub u soo xidhay,
Gudgudaha hilaaciyo
Gu,ga roobka da,ayana
Gacan layma soo duwo.
Gayigaan ku noolahay
Gidigood shimbirihii
Xamarihii golayn jiray
Galbiskiyo ciyaaraha
Qudunquuto iyo gallaw
Gorgor iyo jugliyo xiid
Galaydh iyo tukiyo fiin
Billi iyo gob yahankii
Guuguule iyo habas
Ama gilingil iyo baas
Guumaystiyo adaridii
Ama haad hawada gala
Xidinxiito gaadh ka ah
Sidii ga,yiga loo diray
Iyo qoolay aan gabin
Xilkii guulle farayoo
Sumadina u gaar tahay
Isu gee dhamaanoo
Ga,yigaan ku noolahay
Ugaadhii iniba gaar
Goonyaha ku noolayd
Iyadana gam laga sii.
Hadaan guuri karayana
Galin kama dambeeyeen.
Soo gaabi hadalkana
Wuxu yidhi waxay gaday
Garashada halawdee
Balse galabta lay arag
Baquhuna isoo gaadh
Dhirta wada galaaftoo
Maqlay guuxa baxayee
Durba lay go’aansaday
Sida lay gammuuree
Hadaan soo gunaanado
Waxay gaadhay meeshii
Anigiyo ma garatada
Loo kala guntanayee
Gardarada dhirtoo idil
Gufi looga simay iyo
Gafka dhacay ma dawbaa.?
Afartaa gun iyo baar
Waxan uga gol leeyahay
Gartan maanso ugubiyo
Waxaa lagu gudbinayaa
Garnaqsiga dhirteenee
Ilayn geedku waa TIMIR,!
Ilmo go,bo, ka tidhiyoo
Gondihiisa lagu shiday
Olol iyo dab gubayoo
Dadna goonya joogaan.
