Hargeysa (Hayaannews):- Guud ahaan qaaradaha dunida oo dhan ayaa si wayn looga xusay xuska 28 aad ee maalinta qarannimada Somaliland oo ku beegnayd 18 May,waxaanay guud ahaan jaaliyadaha kala jooga dalalka caalamka ee adduunku ay si wayn u xuseen 28 guurada ka soo wareegtay maalinta qarannimada Somaliland oo ah maalintii Somaliland ay dib ula soo noqotay xornimadeedii kuna dhisatay dawladnimadeeda.

Maalinta qarannimada Somaliland oo ah maalin ay leeyihiin guud ahaan shacabka Somaliland isla marlaana ay meel uga soo wada jeedaan illaalinteeda iyo difaaceeda ayay jaaliyadaha dibadda ku dhaqani kala sinnaayeen xuskeeda shacbi waynaha ku sugan dalka gudihiisa.

Hay’adda Qurbajoogga ee Wasaaradda Arrimaha Dibadda iyo Iskaashiga Caalamiga ah ee Somaliland ayaa bogaadisay dhammaan Jaalliyadaha Somaliland ee u debbaal degay Xuska Sannadguurada 28aad ee maalinta qarannimada Somailand ee 18 May ee 2019.

 Hay’adda Qurbajooggu waxay sheegtay in Munaasibadda 18ka May laga xusay dalalka boqortooyada Ingiriiska, Germany, Finland, Sweden, Norway, Denmark, Belgium, Holland, France, Italy, Ireland, Canada, USA, Djibouti, Kenya, South Africa, Imaaraadka, Kuwait, iyo Australia iyo Finland.

Waxaanay Hay’adda qurba joogga Somaliland ee wasaaradda arrimaha dibedda iyo iskaashiga caalamiga ahi ay intaa raacisay in dhammaan qaaradaha dunida oo dhan sannadkan laga wada xusay sannad guurada ka soo wareegtay maalinta qarannimada Somaliland ee 18 May.

Jaaliyadaha reer Somaliland ee dalalka caalamka ku nool, ayaa kaalin muuqata ka sameeyay waddamada ay ku nool yihiin isla markaana madaxda dalalkaas gaadhsiiyay codsiyo iyo dhambaallo ay ku muujinayaan sida ay Somaliland u tahay dal gaar ah oo madaxbannaan oo xaq u leh in ay beesha caalamka ka hesho aqoonsi buuxa.

Taasoo ah mid ay kaga run sheegayeen xaqiiqada ka jirta dalka Somaliland iyo hirgelinta hannaanka dimuquraadiyadeed ee ka hana qaaday Somaliland oo ah dal ku tallaabsaday hannaan doorashooyin oo kala dambeyay oo ay kaga duwan tahay dalal badan oo ka mid ah qaarada afrika.

Hay’dda qurba joogga Somaliland,ayaa si wayn u hambalyaysay guud ahaan jaaliyadda ku dhaqan qaaradaha kala duwan ee caalamka ee u dhashay Somaliland ee sida weyn u xusay maalinta qarannimada Somaliland oo ay sheegtay in ay guteen waajibaad qaran oo saarnaa jaaliyadda reer Somaliland meel kasta oo ay joogaan,waxaanau ku dar daartay iksu duubni iyo wada jirka jaaliyadaha Somaliland ee dibedda meel kasta oo ay joogaan iyo xisbi kasta oo ay taageersan yihiinba waxaanay ku adkaysay in ay ogaadaan in asxaabta qaranku ay yihiin xisbiyo dalku leeyahay waxa lagu wada midaysan yahayna ay tahay illaalinta iyo difaaca jirintaanka qarannimada Somaliland.