Hargeysa (Hayaannews) Agaasimaha Waaxda Xidhiidhka Dadweynaha lyo Xogta Wasaaradda Horumarinta Maaliyadda Axmed Muuse Maxamed ayaa tababar ugu soo xidhay 20 sarkaal oo ka kala socday Xafiisyada Daryeelka Cashuur-Bixiyaha ee Waaxaha Cashuuraha-Berriga, Kastamada, Xidhiidhka Dadweynaha iyo Waaxda Arimaha Ganacsiga Gaarka ah.
Tababarka oo qaatay laba cisho waxa hawl-wadeenada lagu barayey aqoonta lagu maareeyo daryeelka macaamiisha (cashuur-Bixiyaha), taasoo looga golleeyahay sidii kor loogu qaadi lahaa isla markaana loo wanaajin lahaa xidhiidhka ay Wasaaraddu la leedahay guud ahaan Dadweynaha reer Somaliland gaar ahaana cashuur-bixiyaha.
Wasaaradda Maaliyaddu Iyadoo fulinaysa awaamiirta Xeerka Maamulka Maaliyada Xeer .Lr. 75/2006, iyo Mabaadi’da Barnaamijka Dib-U-Habaynta Maamulka Maaliyadda Dawladda, waxay mudnaanta siinaysaa sanadkan 2021-ka tayeynta shaqada iyo shaqaalaha , si loo helo hawl-wadeeno aqoontoodu sareyso, isla markaana, fahamsan hanaanka loola dhaqmo cashuur-bixiyaha.
Wejiga labaad ee tababarkan ayaa loo qaban saraakiisha xafiisyada Wasaaradda Maaliyadda ee gobolada iyo degmooyinka Dalka guud ahaan.