Wuxuu ka hadlay qasaaraha nafeed iyo hantiyeed ee ka dhashay roobkii habeen hore

Hargeysa (Hayaannews):- Wasiirka Wasaaradda Arrimaha gudaha Somaliland,ayaa digniin adag u diray ganacsatada awday laagaha biyo mareenada ah iyo shirkadaha laydhka ka dib roob xalay ka da’ay caasimadda Somaliland ee Hargeysa oo sababay dhimashada lix qof iyo dad ku dhaawacmay iyo qasaare hantiyeed oo kal.

Waxaa kale oo uu wasiirku intaa raaciyay in qasaaraha dhimashadu ay gaadhay lix qof isla markaana ay jiraan dad badan oo ku dhaawacmay iyo hanti guryo iyo gaadiidba isugu jirta oo ku burburtay.

Waxaana sidan shaaca ka qaaday wasiirka wasaaradda arrimaha gudaha Somaliland mudane Maxamed Kaahin Axmed ka dib kormeer ballaadhan oo uu ku soo sameeyay guud ahaan caasimadda Hargeysa oo uu socdaal ku gaalaa bixinayay illaa habeen hore.

Wasiirka wasaaradda arrimaha gudaha Somaliand mudane Maxamed Kaahin Axmed ugu horeyn waxaa uu warbaahinta la wadaagay khasaaraha ka dhashay roobkii habeen hore waxaanu yidhi “Dhimashadu shan qof ayay ahayd xalay(habeen hore) hal qof ayaa saaka(shalay) la helay, marka dhimashadu waa lix, dhaawaca illaa hadda aynu heynaana waa 12-qof intooda badanina way wanaagsan yihiin, waxaa aad u faro badan gaadiidka ku burburay roobka oo tiradoodu gaadheyso 12-gaadhi, tira kale oo 50 gaadheysana waxaa badbaadiyay ciidamada booliska ayaa ka samata bixiyay daadadkii rogmanayay, tirada guryaha khasaaruhu gaadhey illaa hada lama hayo, nasiib wanaag guryihii uu jiingadda ka qaaday dadkii ku jiray cidi waxba kumay noqon, masuuliyiinta dawladuna waxaay soo sugeen dhammaan goobihii ay waxyeeladu soo gaadhay”

Waxaanu Wasiir Kaahin intaa raaciyay. “Daadadkan waxyeelada keenay waxaa ay ka dhasheen goobihii biya mareenada ahaa oo dhammaan la wada xidhay, biyihiina marka ay isku taageen dabadeedna ay sababeen in xaafado dhan ay dib ugu noqdaan, meherado iyo magaalo dhan oo ay mari jireena, digniin ayaanu u dirayna ganacsatada awday goobihii ay biyuhu marayeen waxaanu leenahay la shaqeeya masuuliyiinta dawaladda hoose”

“Waxaa ka mida shirkadaha leydhka oo laba qof ay ku dhinteen,oo leydhadhkii hore ee gaboobay oo aan laga furin oo ay weli ku xidhan yihiin, leydhka kiisa sare iyo kiisa hoose nidaamka ay isu dhexmaraana way khaldan tahay, in khadka laga saaro dhammaan leydhadhkii hore ee la isticmaali jiray, ee gaboobay in shirkadaha leydhku meesha ka saaraan, inay sameeyaan kooxo wareega xiliyada roobabku ay da’aan ee laga baqayo inay dhibaato leydh ay dhacdo, laguna wargeliyo ciidamada kale ee ay iskaashan karaayaan sida kuwa booliska in shirkaduhu dhammaan ay sameystaan lanbar gurmadka deg dega ah oo markaaba laga baahiyo dhammaan Telefiishada dalka, shirkadaha leydhkana waxaanu fareynaa in aanay xadhko leydh oo jilicsan dadka u gelin.”