Hargeysa(Hayaannews): Wasaaradda Tamarta iyo Macdanta Somaliland oo ka Jawaabtay hadal ka soo yeedhay Soomaaliya.
Sidaa waxa lagu sheegay Warsaxafadeed shalay ka soo baxay Wasaarada Macdanta iyo Tamarta Somaliland
“Shacbiga Somaliland iyagoo ku dhaqmaya hab dimoqraadi ah, waxay dawladdooda u igmadeen inay kor u qaadaan oo ay ilaaliyaan kheyraadka dabiiciga ah. Xukuumadda Jamhuuriyadda Somaliland waxa ay xil ka saran tahay sidii ay u maamuli lahayd kheyraadka dalka, isla markaana ay u horumarin lahayd horumar dhaqaale oo waara oo ay ummaddeeda uga faa’iidaysato. Dastuurkeena oo ay u codeeyeen reer Somaliland, labada gole baarlamaanna ay ansixiyeen, ayaa maamulaya maalgashiga iyo sahaminta.
Ujeeddadeenu waa in aan kor u qaadno xaaladda nololeed ee muwaadiniinteena iyo kobaca dhaqaale ee qarankeena. Dawladdu waxay awood u leedahay inay maalgashato shisheeye si ay u sahamiyaan ugana faa’iidaystaan Jamhuuriyadda Somaliland oo ay ka faa’iidaysan karaan kaarboon-karboonka iyo khayraadka macdanta sida uu qeexayo dastuurka iyo xeerka batroolka ee 95/2001 ee Somaliland.
Ma jirto cid aan dawladda Somaliland ahayn oo awood u leh inay sheegato ama ku abaalmariso
shatiga sahaminta gudaha Somaliland.
Somaliland waxay sii wadi doontaa inay heshiisyo laba geesood ah la gasho maalgashadayaasha caalamiga ah. Ma ahan markii ugu horeysay oo maamulka taagta daran ee Soomaaliya uu isku dayo inuu sheeganayo kheyraadka dalkeena isla markaana uu isku dayo inuu hor istaago horumarkeena dhaqaale inkastoo heshiisyo badan lagu gaaray inaan la siyaasadeynin horumarka labada dal, waxaana taasi cadeyn u ah isku daygii ay ku doonayeen inay ku joojiyaan. horumarinta Dekedda Berbera, abuurista sanduuqa horumarinta Somaliland, iyo la shaqaynta shirkadaha sahaminta shidaalka. Soomaaliya waa in ay ogaataa in hadallada aan macnaha lahayni aanay wax saamayn ah ku yeelanayn qaranimada iyo jiritaanka Somaliland.
Waxa aanu sii wadi doonaa in aanu si dhaw ula shaqayno saaxiibadayada caalamiga ah sida Genel Energy, OPIC Somaliland Corporation (CPC Corporation), RAK GAS iyo kuwa kaleba, anagoon baqdin iyo eex lahayn. Somaliland waxay ku qalabaysan tahay wax-ka-hortagga iyo adkaysiga labadaba, taas oo u oggolaanaysa inay la dagaallanto faragelinta kuwa doonaya inay carqaladeeyaan horumarkayaga.
Somaliland waxay horumarisay deegaan xasiloon, ammaan ah, soo jiidasho leh oo maalgashi. Waxaan ku dhiirigelinaynaa maalgashadayaasha shisheeye inay booqdaan oo ay baaraan fursadaha maalgashi ee Somaliland.
