Waa maanso wax sheeg iyo waano ah ,oo ka hadlaysa saxaafadda iyo saxafiga quman Isla markaana toosin iyo tallo siinaysa dhamaan inta warbaahinta ka hawlgasha.
Waxa hal abuuray Mubaarik Cabdi Yuusuf.
waxaanay ku bilaabmaysaa sidan:-
Saxaafadu waa
Seef laba afloo
Samo iyo xumaan
Kolba waa siduu
Saxafigu u dhigo
Hadii saxalka iyo
Saymo laga jiroo
Sida ay tahiyo
Sifaheeda wacan
Inta lagu sar jaro
La sagsaaginee
Runta saaxiga ah
Sees looga dhigo
Anshaxana la sugo
Waa samo wadiyo
Sahankii bulshada
Waa saxal tiriyo
Saadaaliyaha
Saadanbiyo barida
Qaladkay saxdaa
Dhaqan suubaniyo
Samahay fartaa
Sabi iyo dhalaan
Sidii macalinkay
Suuradaha alliyo
Sadarada cilmiga
Sahal kuu bartaa
Waxay suulisaa
Ficilada siloon
Waxay saamaxdaa
Saynisiyo aqoon
Si yar loo fahmiyo
Subaxii baryaba
Hadba Waxa socdiyo
Saacadaa war jira
Dhacdo sugan inay
Sawirkaa tustooy
Kugu soorto xogo
Marna saanadiyo
Waa saban wax dila
Sumuc iyo rasaas
Siikaawi iyo
Sawaariikh ka daran
Iyo suug dhacee
Saxafiga dalkoow
Ha samayn warkay
Isa sudhan xigtoo
Sabo wada dagtaa
Isku seegayaan
Ama sababi Kara
Salabiyo colaad
Saansaan dagaal
Iyo dhiig susuma
Ileen si xun u sheeg
Sixir iyo ka daran
Saancadiyo balee
Saxafiga dalkoow
Warka aan sugnayn
Een sal iyo raad
Saxa aan lahayn
Dadka uma samee
Ha u soo ban dhigin
Saxafiga dalkoow
Warka sogordihiyo
Sal fudayd ka dhawr
Ku salee xaqiiq
Ku sargoo wacyiga
Sabankaa jiroo
Si laguu fahmana
Kala saar xarfaha
U dhig sida u fudud
Umadana u saaf
Xog la saaray caad
Oo noqo sirdoon
Siduu xaalku yahay
Ka sal gaadha’ oo
Wakhti siiya badan
Saxafiga dalkoow
Siniin raac ha noqon
Soori qaadatoo
Ha u noqon salaan
Saacida midkii
Lacag siiya iyo
Saaxiib la jira
Nin siyaasiyoo
Waddankiisa sira
Suxafiga dalkoow
Sokeeyaha is dila
Seeftiyo warmaha
Soodhkiyo qoryaha
Isku Soo gurtee
Ee kala saftana
Isku Soo dhawee
Suluxiyo ka tali
Nabadiyo samaha
Oo noqo suldaan
Isku saba bulshada.
Saxafiga dalkoow
Ku sifow wanaag
U sinow dhamaan
Xisbiyada saroo
Midna sabab qabiil
Sacab hawgu tumin
Saxafiga dalkoow
Ganacsiga sirgacan
Sixir bararka dhala
Siyaasiga guracan
Culimada salidan
Umadana saskiyo
Sakatiga ku rida
Dhakhtarada suntiyo
Kiniinada siloon
Dadka siiya ‘ee
Inta ay sariir
Madhan seexiyaan
Sakaraad ildaran
Sahay kaga furtee
Sina uga naxayn
Noqo kii saxee
Ka sameeya warar
Saamayn leh togan
Una Soo bandhiga
Bulshadani sakhiran.
Saxafiga dalkow
Danyariyo sabool
Dulmanaha la siray
Mid u sara kacoo
Gacan siiye noqo
Xilka aad sidana
Sahal maaha ee
Sumcadiisa dhawr.
Hayaannews, office
Hargeysa, Somaliland
Email: Hayaannewssoma@gmail.com