Hargeysa (Hayaannews):- Madaxweynaha Jamhuuriyadda Somaliland Mudane Muuse Biixi Cabdi,ayaa xafiiskiisa ku qaabilay wefti ballaadhan oo ka socda shirkada GULHAN LTD. DEARSAN.Co oo laga leeyahay dalka Turkiga.
Madaxweynaha qaranka,ayaa xafiiskiisa ku qaabilay weftiga ka socda shirkadda GULHAN LTD. DEARSAN oo uu hoggaaminayay guddoomiyaha guud ee shirkaddaas Mr. Aziz Yildirim oo safar shaqo ku yimi Somaliland
Madaxweynaha Somaliland,ayaa uga mahad naqay shirkadda GULHAN LTD. DEARSAN in ay Somaliland yimaadaan oo ay ku dhiiradaan in ay Somaliland maalgashi ku sameeyaan.
Waxaanu uga xog warramay sida ay Somaliland u tahay dal dihin oo ku habboon in la maalgashado.
Kulankaa waxa kale oo ka qayb galay isla markaana soo bandhigay sida ay diyaarka ugu yihiin in ay ka faa’iidaystaan fursadaha maalgashi ee shirkaddu soo bandhigtay wasiirada Gaadiidka iyo horumarinta jidadka,Ganacsiga, wershadaha iyo Dalxiiska,Beeraha iyo Xannaanada Xoolaha iyo kalluumaysiga.
Kulankaa ka dib war-saxaafadeed ka soo baxay qasriga Madaxtooyad Somaliland oo lagu faah faahiyay kulankaa ayaa u dhignaa sidan.
“Madaxweynaha Somaliland oo xafiiskiisa ku qaabilay madax ka socotay shirkada GULHAN LTD. DEARSAN.Co, oo laga leeyahay dalka Turkiga
Madaxweynaha Jamhuuriyadda Somaliland, Mudane Muuse Biixi Cabdi waxa uu maanta(Shalay) xafiiskiisa ku qaabilay madax ka socotay shirkada GULHAN LTD. DEARSAN.Co, oo laga leeyahay dalka Turkiga oo uu hoggaaminayey guddoomiyaha shirkadaasi Mr. Aziz Yildirim oo safar shaqo ku yimid Jamhuuriyadda Somaliland.
Masuuliyiinta Shirkadan Turkiga ah ee madaxweynuhu kulanka la qaatay ayaa ujeedada ay u yimaadeen Somaliland ay tahay in ay danaynayaan fursadaha maalgashi ee ka jira dalka, iyo sidii ay qayb uga noqon lahaayeen mashaariicda maalgashi ee ka hirgelay Somaliland, gaar ahaan maalgelinta, kalluunka, macdanta, wershedaha, beeraha iyo tayaynta waddooyinka waxayna sheegeen inay ku qanceen dedaalka iyo horumarka Jamhuuriyadda Somaliland samaysay iyo maalgashiyada waaweyn ee waayadan dambe ka hanaqaaday dalka.
Iyagoo taa ka duulayana ay doorbideen inay dalka Somaliland ka fuliyaan maalgashi, isla markaana tusaale u noqdaan shirkadaha iyo maalgashadayaasha waddanka Turkiga si ay qayb uga noqdaan maalgashiga dihin ee Jamhuuryadda Somaliland ku duugan.
Waxaa kale oo kulankaa wasiirrada wasaaradaha, Ganacsiga, wershedaha iyo dalxiiska, macdanta iyo tamarta, gaadiidka iyo horumarinta jidadka, horumarinta maalgashiga, horumarinta beeraha, Xannaanada Xoolaha iyo horumarinta kalluumaysiga, ayaa kulanka ku soo bandhigay qorsheyaasha maalgashi iyo siday diyaarka ugu yihiin inay ka faa’iideeyeen fursadaha noocan oo kale ah.
Ugu danbayntii Madaxweynuhu waxa uu ku bogaadiyey masuuliyiinta shirkadaas imaatinkooda Somaliland iyo inay xogogaal u noqdaan horumarka ganacsi iyo dhaqaale ee ka jira waddanka, isagoo xusay in ay xukuumadda iyo shacbigaba ka go’an tahay soo dhawaynta cidkasta oo khayraadka dihin ee dalka ku duugan maalgashi ku samaynaysa.”
