SOMALILAND: Madaxweyne Biixi , Ayaa Kormeeray Goobaha Ay Is-Diiwaangelintu Ka Socoto Ee Gudaha Caasimadda Hargeysa.

Hargeysa (Hayaannews) – Madaxweynaha Jamhuuriyadda Somaliland Muuse Biixi Cabdi, ayaa maanta kormeer ku soo maray goobaha Ay Is-Diiwaangelintu Ka Socoto Ee Gudaha Caasimadda Hargeysa.

War ka soo baxay xafiiska af-hayeenka madaxweynaha Somaliland Maxamuud Warsame Jamac, soona gaadhay wakaaladda wararka Somalilland ee SOLNA ayaa u dhignaa sidan:-

Madaxweynaha Jamhuuriyadda Somaliland, Mudane Muuse Biixi Cabdi, ayaa maanta kormeeray goobaha ay ka socoto wejiga labaad ee is-diiwaangenlinta cod-bixiyayaasha ee ku yaalla degmooyinka kala duwan ee ay ka kooban tahay caasimadda Hargeysa.

Madaxweynaha oo uu wehelinayo guddoomiye-ku-xigeenka labaad ee xisbiga KULMIYE, Mudane Axmed Cabdi Xuseen ( Axmed Cabdi-dheere), ayaa soo indho-indheeyey hannaanka ay is-diiwaangelintu ka socoto goobaha gudaha caasimadda, waxana uu kormeerkiisa kusoo maray goobo ku yaalla degmooyinka Axmed-dhagax, Maxamed Mooge, Axmed Macallin Haaruun iyo Ibraahim Koodbuur, isaga oo halkaas kusoo arkay dadweyne safaf ugu jira sidii ay isu diiwaangelin lahaayeen, islamarkaana warbixinno ka dhegaystay saraakiisha Komishanka Doorashooyinka u qaabilsan goobahaas oo si habsi leh u gudanayey shaqadooda.

Booqashada madaxweynaha, ayaa timi iyada oo codsi ka yimi shacabka dartii ay Komishanka doorashooyinku kordhiyeen muddadii ay hore ugu qoondeeyeen inay is-diiwaangelintu socoto oo Afar maalmood ahayd.

#Hayaannews, Office