Hargeysa (Hayaannews)- Wefti ka kooban masuuliyiinta labada xisbi ee KULMIYE iyo UCID, ayaa shalay subax si mideysan safar shaqo ugu baxay Caasimada Wadanka Kenya ee Nairobi, waxaana masuuliyiintani ay kulamo la qaadan doonaan safiirrada iyo dibloomasiyiinta waddamada Somaliland ka taageera dhinacyada doorashooyinka iyo dimuquraadiyada.

Masuuliyiinta iyo xubnaha weftigan oo kala ah Guddoomiye ku xigeenka koobaad ee xisbiga Kulmiye, ahna Wasiirka Wasaaradda Arrimaha Gudaha Maxamed Kaahin Axmed, gudoomiye ku xigeenka labaad ee xisbiga Kulmiye Axmed Cabdi Dheere, Guddoomiyaha Xisbiga UCID Faysal Cali Xuseen (Waraabe) iyo Ku Xigeenkiisa Axmed Cabdi Muuse (Abyan), ayaa muddo saddex maalmood ku sugnaan doona Caasimada Nairobi ee Kenya.

Socdaaka weftiga labada xisbi ee KULMIYE iyo UCID ayaanay labada dhinac ka soo saarin wax faahfaahin ah, iyaga oo warbaahintana u sheegeen inay faahfaahin intaa ka badan ay ka soo saari doonaan marka uu u soo idlaado socdaalkooda Nayrobi. Balse Guddoomiyaha ku meel gaadhka ah ee xisbiga Waddani ayaa hore u shaaciyay kulankan mar uu habeen hore hadal ka jeediyay xaflad afur ahayd oo uu madaxweynaha Jamhuuriyada Somaliland Muuse Biixi Cabdi ku qabtay Qasriga Madaxtooyada.