“Hankii gobi lahayd, talo ku heeraaba
Wax ku haybi si aan reer ahayn, hiilna ugu muuji
Hirgeliya afkaar lagu kulmiyo, yool hal-beeg sido.” Tuducyadani waxay ka mid yihiin Gabayga la yidhaahdo “HIRGAL” ee uu tiriyay Abwaan Cabdiraxmaan Ibraahim Abees oo ka mida Abwaanada da’ada yar ee reer Somaliland aadka loo jecel yahay.
Gabaygan Hirgal waxa uu ka mid yahay kuwii Abwaan Cabdiraxmaan Abees lagu qoonsaday 2019kii, kadibna uu Xabsi ku muteystay ayuu ka jeediyay Bandhig-Sugaaneedkii uu xalay ku qabtay Magaalada Burco.#Hayaannews.
“Waxa halista guudkeenna dhigay, waa hoggaan xumo”Wuxuu kula hadlay dawladda iyo hoggaanka dalka, Waxaanu Gabaygu u dhignaa sidan:
“Hummaag laga aloosiyo hadduu, hoodo gabay sheegto
Isagoo hagoogtuu xidhiyo, sharaf ku heeryaysan
Hogga boqorka, higaaddiyo hirwada, maanso iyo hello
Hollashada murtida waan taxaa, heel la marinaayo
Runna kama habsoodee xaqaan, hibo difaacaaye
Xadhiggii haddaan kaaga furay, tixda hilaygiiye.
Saddex qodob ayaan ku hayaa, oon handanayaaye
Hali waa waxaan eednayee, goorna hadhi waayay
Halna waa mas’uullada saree, fuulay heegada
Halna waa siday ila tihiyo, hoga-tus waayeel.
Hali waa wax aan eednayee, goorna hadhi waayay.
Markay xulasho hayb-hayb gashaa, qaranku hoogaaye
Hebad baad siyaasiga u tahay, waanad huruddaaye
Haldhig beena, hufnaan iyo wanaag, heesi daba taallo
Ma hanbeeye, nimaan hoo lahayn, huubahana laaca
Naftii hafarka, hoosaasintiyo, faanka ku hataaray
Habacsanida adigoon mar qudha, harowsi diidaynnin
Waa waxa hankaagii dilee, hayjad kugu ooday
Hawo iyo qabiil iyo jibbaa, lagu hungoobaye
Jeeroy hannaankii wacnaa, hanato laabtaadu
Gobannimadu higil bay dhex taal, soona heli maysid
God uu halaqu leeyay gashaa, good hariirya lehe
Halgan iyo ka daa iyo hayaay, heegan lagu joogo
Hadimiyo wareer baad ku jiri, hiiftan iyo ciile
Ku heehaabtay meel dhexe dadnimo, daacad ka huleeshay.
Halna waa mas’uullada saree, fuulay heegada’e.
Dawladnimo habkii lagu ogaa, haybad lagu dhaato
“Ha hagaajo” ninkii aan lahaa, haykalkii dumay
Isaguna hareer buu ka maray, hilinkii toosnaaye
Omas iyo harraad buu dhex furay, geeddigii hebel’e
Hirar doogle iyo, hawd iyo caleen, loo hor-seed galo
Gadaal guur hayaankii socdaal, horena loo diidye
Halkii laga baqooluu mar kale, heeryadii dhigay.
Hirdankiyo walaalaha is dilay, Sooshan lagu hoobtay
Dabkaa huray raggii demin lahaa, way hagranayaane
Iyaba waa halbowlaha jidhkiyo, haniyaheenniiye
Wixii kaga habboonaa marnaba, dawladdaan hidinne
Hanti aada, hayn iyo adduun, loogu gacan haadsho
Gurmad haw yidhaahdiyo la waa, hirashadeedii.
Halleeyiyo dalkeenunna ka weyn, Heegadiyo suuqa
Ku mashquushay haamaha Berbera, hadalka dhiibiiye
Hawl yar oo basiidaad ta mudan, kaga habsaantaane
Horma-gelin qorshaha tii leh baa, loo hitiqiyaaye
Doorashada hujuunkii ka dhacay, haarti may bi’inne
Hurin weliba gar bay iskeed, hibasho oydaaye
Ololaha sidii loo haftee, loo hadh geli waayay
Habar wacasho waataa darteed, haamo loo shiraye
Haddii aan wanaaggiyo heshiis, dawladdu huraynnin
Hab-samaan haddaan loo tixgelin, kii hal-tabanaaya
Qarannimo huluul bay xushaa, meel hadoodilan’e.
Marka madaxda hadal daw ahaa, loo hal celin waayo
Hadh qoodaalka qiyaamaha fogba, hiirta kula jooga,
“Hab,” hadday tidhaayoo abaar, uunku hurushoobo
Kul holcaaya, boodh iyo habaas, huguf ku duulaayo
Dal harraadan awr dhaamiyaa, muu hamuun tirine
Hayin qudhi wuxuu qaadaya, haamo iyo dhawre
Tashigaa la hoobaaliyaa, xaajo hubinteeda
Habrashadu dar ay ceeblatoon, kugu hadaaqaynnin
Hindisaha rag baa lagu yidhaa, “Heedhe say tahaye”
Boqollaal haldoorliyo wax-garad, heellan baa jira’e
Qaar hilaadda kula eegayiyo, raadso hana-qaadka.
Hadhuub daatay caana la yidhi, “Yaan hanbadu raacin,”
Halkaan adiga talo kuugu daro, een ku hiranaayo
Sooyaalkaa hadhow soo bandhigi, kii hareer maraye
Dib u hano kalsoonida dadkoo, hilow ku soo jiido
Himilada danbaysiyo rejada, muuji hirarkeeda
Hadashada midnimo loo dhanyahay, haabo fulinteeda
Waxa deeqa aadmiga hilbaha, waa cadliye “Hoo,” dheh
Hoggaamiye waxaa laga dhaxlaa, qaar wax sii haga’e
Nidaamkoo hagaag loo dhisoo, haydhka laga saaro
Hor-markuba hadaa waa inaa, hiigsi nololeede
Hayil-debecsan, hufnaan iyo bisayl, maanta ku hoggaami.
Halna waa siday ila tihiyo, hoga-tus waayeel.
Nin hammiya mid lagu soo hirtiyo, hawl kar iyo guurti
Habbisaa garaadkii wacnaa, heegga loo sudhaye
Nimanyahow hawaalaha adduun, halabsadoo dhaada
Wixii hooto kugu soo dhacee, heeray boqontaada
Dib u eeg halaaggii ku maray, waad hawiranteene
Hoos u dhugo duruuftaad qabtiyo, heerka noloshaada
Hataq iyo dalluun lagu dhiciyo, haadan lagu ciiro
Waxa halista guudkeenna dhigay, waa hoggaan xumo.
Nidaam heedaddaysiyo dastuur, haylo kala jaada
Kun hab oo guraangura markaan, hoy isugu keenay
Ayaan heedaddowgii jid kale, baadi ku hallownay
Habaqlaannu Giriyaad cidla ah, hugun la jiifnaaye
Is haaraanka waa waxa ku baday, eed la hogataaye
Dhaqankiyo aqoontii hiddaha, maaddiga hagaagsan
Intaad hadhac u soo waabataan, haadsha gebigoodba
Waayahaaga wixii kaga habboon, halal u soo guuri
Hadaf mida, hankii gobi lahayd, talo ku heeraaba
Wax ku haybi si aan reer ahayn, hiilna ugu muuji
Hirgeliya afkaar lagu kulmiyo, yool hal-beeg sido.
#Hayaannews, Office
Hargeysa, Somaliland
Email: Hayaannewssoma@gmail.com
